شورش زدہ صوبے بلوچستان میں ایف سی کے قافلے پر خودکش حملے کے نتیجے میں 3 ایف سی اہلکاروں سمیت 7 فراد شہید اور متعدد زخمی ہوگئے ہیں۔
سیکیورٹی ذرائع کے مطابق دہشتگردوں نے آج صبح نوشکی میں ایف سی قافلے پر بارودی مواد کا دھماکا اور خودش حملہ کیا جس پر فورسز نے حملہ آور دہشت گردوں کے خلاف فوری موثر جوابی کاروائی کی۔
ذرائع نے بتایا کہ جوابی کارروائی میں خود کش حملہ آور سمیت 4 دہشت گرد جہنم واصل کر دیے گئے جبکہ بزدلانہ خود کش حملے میں ایف سی کے 3 جوان اور 2 سویلین شہید ہو گئے۔
سکیورٹی ذرائع کا کہنا ہےکہ آخری دہشت گرد کے خاتمے تک کلیئرنس آپریشن جاری رہےگا۔
حملے میں زخمی ہوئے والوں میں سے متعدد کی حالت تشویشناک ہے جنہیں ہیلی کاپٹر کے ذریعے کوئٹہ منتقل کر دیا گیا ہے۔
دوسری جانب پولیس کا کہنا ہے کہ نوشکی دالبندین شاہراہ پربس کے قریب دھماکے میں 5 افراد جاں بحق اور 35 زخمی ہوئے جنہیں طبی امداد کے لیے نوشکی اسپتال منتقل کیا گیا، اسپتال میں دوران علاج 2 زخمی دوران علاج دم توڑ گئے جس کے بعد جاں بحق افراد کی تعداد 7 ہو گئی، زخمیوں میں متعدد افراد کی حالت تشویشناک ہے۔
وزیر اعظم شہباز شریف نے نوشکی میں دھماکے کی سخت الفاظ میں مذمت کرتے ہوئے کہا کہ اس قسم کی بزدلانہ کارروائیاں دہشت گردی کے خلاف ہمارے عزم کو متزلزل نہیں کرسکتیں۔
وفاقی وزیر داخلہ محسن نقوی نےکہا ہےکہ معصوم لوگوں کو نشانہ بنانا سفاکیت کی انتہا ہے، اس طرح کی بزدلانہ کارروائیوں کے ذریعے قوم کے عزم کو کم زور نہیں کیا جاسکتا۔
وزیراعلیٰ بلوچستان سرفراز بگٹی نے کہا کہ صوبے کے امن سے کھیلنے والوں کو عبرتناک انجام تک پہنچائیں گے، بزدلانہ حملے ہمارے حوصلے پست نہیں کر سکتے، دہشت گردوں کوکہیں پناہ نہیں ملےگی، بلوچستان میں ہر قیمت پر امن قائم کریں گے، دشمن سن لیں ریاست ان کے ناپاک عزائم خاک میں ملا دے گی اور یہ جنگ آخری دہشت گرد کے خاتمے تک جاری رہے گی۔