پنجاب پولیس نے میانوالی میں انٹیلیجنس کی بنیاد پر کامیاب آپریشن کرتے ہوئے 10 دہشتگردوں کو ہلاک کردیا ہے۔
ترجمان پنجاب پولیس کے مطابق محکمے کو ضلع میانوالی کے علاقے ملا خیل میں دہشت گردوں کی موجودگی کی اطلاع ملی جس کے بعد ڈی پی او میانوالی اختر فاروق کی قیادت میں پولیس اور ایلیٹ فورس کی بھاری نفری نے آپریشن کیا۔
آپریشن میں حصہ لینے والی ٹیم میں ڈی پی او میانوالی اختر فاروق، ڈی ایس پی سرکل عیسیٰ خیل محمد اقبال، ایس ایچ او تھانہ مکڑوال، ایس ایچ او تھانہ کمرمشانی، پولیس اور ایلیٹ فورس کی ٹیمیں شامل تھیں۔
ترجمان نے کہا کہ پولیس اور خوارجی دہشت گردوں کے درمیان شدید فائرنگ کے تبادلے میں 10 دہشتگردوں کو ہلاک کردیا گیا۔
ترجمان پنجاب پولیس کے مطابق آئی جی پنجاب ڈاکٹر عثمان انور نے دہشت گردوں کے خلاف بڑی کامیابی پر ڈی پی او میانوالی اور ٹیم کو شاباش دی۔
آئی جی ڈاکٹر عثمان انور نے کہا کہ پنجاب پولیس الرٹ ہے، ہم دہشت گردوں کے ناپاک عزائم خاک میں ملا کر دم لیں گے۔
ڈی پی او میانوالی اختر فاروق نے کہا کہ میانوالی پولیس امن دشمن عناصر کا اسی طرح جواں مردی سے مقابلہ کرتی رہے گی۔